Скажы НЕ смяротнаму пакаранню

Пасля атрымання звароту ад праваабаронцаў з заклікам правесці парламенцкія слуханні па абмеркаванні магчымасці ўвядзення мараторыя на смяротнае пакаранне ў Беларусі, дэпутат Палаты прадстаўнікоў Алена Анісім прапанавала разгледзець гэтае пытанне на другой сесіі ніжняй палаты парламента шостага склікання, якая адкрыецца ў пачатку красавіка 2017 года, паведамляюць naviny.by.

Дэпутат Палаты прадстаўнікоў шостага склікання Алена Анісім, фота БелаПАН

«У мяне прапанова разгледзець на другой сесіі Палаты прадстаўнікоў пытанне аб увядзенні мараторыя на прымяненне смяротнага пакарання і да адкрыцця гэтай сесіі, можа быць, правесці парламенцкія слуханні па гэтай тэме», - сказала яна 16 снежня ў Авальнай зале пасля разгляду пытанняў парадку пасяджэння.

«Чаму гэта важна? Па-першае, у нас цяпер разглядаецца пытанне аб увядзенні інстытута па правах чалавека. Па-другое, лічу, што ўвядзенне менавіта мараторыя (мы не кажам аб адмене смяротнага пакарання) павысіць і міжнародны аўтарытэт краіны, і ўзровень нашага органа. Атрымліваецца, што толькі наша краіна прымяняе смяротнае пакаранне ў цэнтры Еўропы», - адзначыла Анісім.

Няўжо беларусы з'яўляюцца «самым крыважэрным народам», а ў краіне «самая крымінагенная абстаноўка», звярнулася яна з пытаннямі да дэпутацкага корпусу. Пры гэтым Анісім нагадала, што ў Расеі, з якой Беларусь знаходзіцца ў Саюзнай дзяржаве, уведзены мараторый на прымяненне смяротнай кары.

«У нас усе гэтыя працэдуры прапісаны ў рэгламенце. Калі ласка, у адпаведнасці з рэгламентам і будзем дзейнічаць», - адрэагаваў на прапанову Анісім старшыня Палаты прадстаўнікоў Уладзімір Андрэйчанка.

Нагадаем, актывісты кампаніі “Праваабаронцы супраць смяротнага пакарання ў Беларусі” і праваабаронцы 12 снежня накіравалі звароты да ўсіх 110-ці дэпутатаў Палаты Прадстаўнікоў Нацыянальнага сходу з заклікам правесці парламенцкія слуханні па абмеркаванні магчымасці ўвядзення мараторыя на смяротнае пакаранне ў нашай краіне. Парламентарыі іх атрымалі.

Пасля гэтага праваабаронцы Андрэй Палуда і Валянцін Стэфановіч упершыню прынялі ўдзел у міжнароднай канферэнцыі “Адмена смяротнага пакарання і грамадскае меркаванне”, дзе выказалі меркаванне аб неабходнасці ў далейшым праводзіць парламенцкія слуханні з шырокім колам грамадскасці і праваабарончых арганізацый па пытанні адмены смяротнага пакарання ў Беларусі.

З 28 лістапада па 1 снежня стала вядома пра пакаранне смерцю ў Беларусі траіх асуджаныя да вышэйшай меры пакарання - 28-гадовага Івана Кулеша, 31-гадовага Сяргея Хмялеўскага і 49-гадовага Генадзя Якавіцкага. Праваабаронцы мяркуюць, што ўсе трое былі расстраляныя 5 лістапада.

Новыя пакаранні ў Беларусі асудзілі Міжнародная федэрацыя правоў чалавека, Савет Еўропы і Еўрасаюз.

Беларусь застаецца адзінай еўрапейскай краінай, дзе ўжываюць смяротнае пакаранне. Менавіта па гэтай прычыне яна не ўваходзіць у савет Еўропы (СЕ) - у 1993 годзе беларускі парламент атрымаў статус спецыяльнага запрошанага ў Парламенцкай асамблеі Рады Еўропы, але ў 1996-м быў пазбаўлены яго пасля рэферэндуму, які захаваў смяротнае пакаранне. Кожны смяротны прысуд у Беларусі традыцыйна асуджаецца інстытутамі СЕ.

За апошнія дваццаць гадоў у Беларусі пакарана больш за 400 чалавек. Толькі адзін з асуджаных да смяротнага пакарання за гэты час быў памілаваны кіраўніком дзяржавы.