Праваабарончая праграма "Вясна" на Беларускім Радыё Рацыя
Кожны аўторак у 19:05 па беларускім часе (паўтор у суботу ў 7:00) у эфіры незалежнай радыёстанцыі "Беларускае Радыё Рацыя" — праграма "Вясна", якая асвятляе падзеі, датычныя правоў чалавека.
Прэм'еру ў эфіры анлайн можна паслухаць праз інтэрнэт тут альбо тут (калі не адкрываецца, то карыстайцеся VPN). А таксама 98,1 FM для Гродна і 99,2 FM для Брэста.
(Анонсы папярэдніх выпускаў глядзіце тут).
Анонс на 31 кастрычніка:
Падзея: Рубрыка прысвечана Ночы (не)расстраляных паэтаў, якая прайшла з 29 на 30 кастрычніка ў розных краінах:
"Махавік рэпрэсій, які быў запушчаны яшчэ з пачаткам савецкай улады, уключаў у сябе і смяротнае пакаранне антысавецкіх элементаў, і нават смяротнае пакаранне для тых, хто падазраваўся ў антысаветшчыне. Таму праблема смяротнага пакарання ў прынцыпе ў гэтым: што калі яно ўведзенае, то вельмі шмат нагодаў ва ўлады ёй скарыстацца", — кажа літаратуразнаўца Ціхан Чарнякевіч.
Праваабарончы слоўнік: На мінулы тыдзень прыпала адразу некалькі важных дат:
- Масавы расстрэл беларускай інтэлігенцыі ў ноч з 29 на 30 кастрычніка 1937 года,
- Першы масавы мітынг у беларусі 30 кастрычніка 1988 года на Дзяды,
- Міжнародны дзень салідарнасці палітвязняў 30 кастрычніка, які паўстаў ў 1974 годзе ў СССР.
Пра ўсе гэтыя даты размаўляем з Валерыяй Чарнаморцавай — стваральніцай Віртуальнага музея савецкіх рэпрэсій у Беларусі і былой палітзняволенай:
"Яны збіраліся за баракам у ГУЛАГу і спявалі беларускія вершы на савецкія мелодыі".
Каментар: 20 гадоў таму ўлады юрыдычна ліквідавалі грамадскае аб’яднанне "Праваабарончы цэнтр Вясна". Пра тые часы ўспамінаем разам з праваабаронцам Аляксеем Колчыным:
"Шэсць ці сем чалавек нас, вясноўцаў, уселіся на падлогу [памяшканя Вярхоўнага суда]—тыпу, захапілі будынак. І працягвалі пэўны час выкрыкваць “Ганьба!”"
