Лукашэнка памілаваў асуджанага да смяротнага пакарання немца Рыка Крыгера
-
- Рыка Крыгер
У Мінскім абласным судзе 24 чэрвеня 29-гадовага супрацоўніка "Нямецкага Чырвонага крыжа" Рыка Крыгера (Rico Krieger) асудзілі да смяротнага пакарання. У Беларусі яго абвінавацілі паводле шасці цяжкіх і асабліва цяжкіх артыкулах Крымінальнага кодэкса, сярод якіх — "акт тэрарызму" (ч. 3 арт. 289 КК). Грамадзянін Германіі не абскардзіў прысуд і ён набыў моц. 30 ліпеня стала вядома, што Рыка напісаў памілаванне на імя Аляксандра Лукашэнку. Апошні ў сваю чаргу сабраў нараду з гэтай нагоды з "людзьмі, непасрэдна датычныя да разгляду гэтай справы". Ужо ўвечары 30 ліпеня, як пішуць прапагандысты, Лукашэнка прыняў рашэнне памілаваць Крыгера.
Для абмеркавання сітуацыі з Рыка Крыгерам Лукашэнка сабраў 30 ліпеня нараду, на фота адтуль можна ўбачыць супрацоўніцу дзяржвыдання "СБ. Беларусь сёння" Людмілу Гладкую, намесніцу кіраўніка адміністрацыі Лукашэнкі Вольгу Чупрыс, старшыню КДБ Івана Церцеля, а таксама следчы і адвакат Крыгера. Як піша "Белта", адвакат грамадзяніна Германіі Крыгера разлічвае на памілаванне:
"Мы разлічваем на акт гуманізму, які прыме кіраўнік дзяржавы. Усё ў руках прэзідэнта Рэспублікі Беларусь. Астатняе — інсінуацыі. Мы чытаем у прэсе шмат дадзеных і звестак, але ў мяне асабіста ніякіх якія пацвярджаюць дадзеных як аб памілаванні, так і адхіленні гэтага хадайніцтва няма. Аляксандр Рыгоравіч сказаў, што будзе разважаць і прыме рашэнне", — сказаў адвакат Уладзімір Горбач па выніках сустрэчы.
Увечары 30 ліпеня Лукашэнка памілаваў немца.
"Тое, аб чым шмат гаварылі і шмат маўчалі ў апошнія дні,адбылося. Рыка Крыгер памілаваны. І гэта вельмі добрая навіна. Я асабіста абстрагіруюся ад усіх разважанняў накшталт "сама дзяржава асудзіла да смерці, сама і памілавала". Насамрэч, скажам шчыра, магла бы і растраляць. Я разглядаю гэта праз праваабарончы аспект і бачу гэту падзею як праяўленне акта гуманізму, хто бы і што ні казаў і якія бы акалічнасці гэтаму не спрыялі.
Адразу хачу нагадаць, што ў камеры смяротнікаў знаходзіцца яшчэ адзін прыгавораны да смерці — Аляксандр Таратута. Хачу падкрэсліць і заклікаць да праяўлення такога ж акту гуманізму ў адносінах і яго: не грамадзяніна Нямечынны, але грамадзяніна Беларусі", — пракаментаваў каардынатар кампаніі "Праваабаронцы супраць смяртнага пакарання ў Беларусі" Андрэй Палуда.
Справа Рыка Крыгера: сабралі ўсё, што вядома
