У Берасці прайшла акцыя супраць смяротнага пакарання ў Беларусі (фота)
10 жніўня ў Берасці сябры Маладога Фронту правялі акцыю па адмене смяротнага пакарання ў краіне. На адной з галоўных вуліц гораду, Савецкай, моладзь раздавала мінакам капэрт-улёткі ўплывовай праваабарончай арганізацыі Amnеsty International.
Ва ўлётках змешчаны зварот да прэзідэнта А.Лукашэнкі і ўраду Беларусі.
Міжнародная праваабарончая супольнасць заклікае кіраўніцтва краіны “неадкладна ўвесці мараторый на вынясенне смяротных прысудаў і іх выкананне з тым, каб у далейшым цалкам адмовіцца ад прымянення смяротнага пакарання ў адпаведнасці з рэзалюцыяй 63/168 Генеральнай Асамблеі ААН ад 18 снежня 2008 года”, а таксама “неадкладна замяніць усе вынесеныя смяротныя прысуды на тэрміны пазбаўлення волі”.
Зварот Amnеsty International аформлены ў выглядзе паштоўкі з указаннем адрасата – “Аляксандр Лукашэнка Прэзідэнт”. Таму кожны са 150 жыхароў і гасцей Берасця, якія атрымалі такія ўлёткі ад маладафронтаўцаў, могуць накіраваць іх па указаным адрасе як сваё уласнае патрабаванне.
Як адзначыў Радыё Рацыя адзін з удзельнікаў акцыі Міхась Ільін, “правакацыяў і затрыманняў з боку ўладаў не было, мерапрыемства доўжылася каля 20 хвілінаў. Большая частка людзей станоўча і з цікавасцю паставілася да праблемы, але былі і абыякавыя”.
Нагадаем, што Беларусь – адзіная краіна ў Еўропе і на постсавецкай прасторы (пасля адмены смяротнага пакарання Узбекістанам з 1 студзеня 2008 году), дзе выносяцца і прыводзяцца ў выкананне смяротныя прысуды.
У студзені 2009 году ў Беларусі распачалася кампанія “Праваабаронцы супраць смяротнага пакарання”, мэтай якой ёсць спыненне смяротнай кары ў краіне і далучэнне Беларусі да агульнаеўрапейскіх каштоўнасцяў. Прадстаўнікі праваабарончай супольнасці краіны падрыхтавалі адпаведную петыцыю. Гэты зварот за подпісамі як вядомых беларускіх дзеячоў, так і простых грамадзянаў будзе перададзены беларускім уладам. Праваабаронцы Беларусі, як і міжнародная праваабарончая арганізацыя Amnesty International, спадзяюцца, што кіраўніцтва краіны пяройдзе да рашучых дзеянняў, скіраваных на спыненне выканання смяротных прысудаў.
Amnesty International - гэта сусветны рух, які аб'ядноўвае 2,2 мільёны чалавек з больш чым 150 краінаў і тэрыторый, якія дамагаюцца спынення грубых парушэнняў правоў чалавека.
Фота
