У Камітэт ААН па правах чалавека накіраваная скарга на парушэнне правоў Васіля Юзэпчука, асуджанага да смяротнага пакарання
Сёння, 9 кастрычніка, напярэдадні Сусветнага дня барацьбы супраць смяротнага пакарання, Камітэт ААН па правах чалавека пацвердзіў атрыманне індывідуальнага звароту Васіля Юзэпчука, асуджанага 29 чэрвеня 2009 года Брэсцкім абласным судом да смяротнай пакарання з канфіскацыяй маёмасці.
2 кастрычніка 2009 года пасля абвяшчэння азначэння Судовай калегіі Вярхоўнага Суду Рэспублікі Беларусь смяротны прысуд Васілю Юзэпчуку набыў моц і можа быць выкананы. На гэтым усе нацыянальныя сродкі прававой абароны былі вычарпаныя, пасля чаго ад імя асуджанага быў накіраваны індывідуальны зварот у офіс Вярхоўнага Камісара па правах чалавека ААН у Жэневе.
У скарзе ўказваюцца артыкулы Міжнароднага Пакту пра грамадзянскія і палітычныя правы, якія, паводле меркавання праваабаронцы, былі парушаныя Рэспублікай Беларусь у дачынненні да Васіля Юзэпчука. Гэта артыкулы 6 (пункты 1 і 2), 7, 9 (пункт 3), 14 (пункты 1, 2, 3 (е), 3 (g)) і 26. Гэтыя артыкулы датычацца права на жыццё, забароны катавання, права на свабоду і асабістую недатыкальнасць, права тэрмінова быць дастаўленым да суддзі з моманту затрымання, права на справядлівы суд і забароны дыскрымінацыі.
Аўтар звароту просіць Камітэт зарэгістраваць зварот у неадкладным парадку і як мага хутчэй звярнуцца да Беларусі як дзяржавы-ўдзельніцы Пакту з просьбай не выконваць смяротны прысуд да разгляду скаргі па сутнасці, каб пазбегнуць невыпраўляльнай судовай памылкі ў дачыненні да ахвяры мяркуемага парушэння.
Беларускія праваабаронцы выказваюць спадзяванні на тое, што скарга будзе зарэгістраваная на працягу некалькіх дзён. Бо ў адваротным выпадку несвоечасовы разгляд звароту будзе бессэнсоўным, паколькі прысуд можа быць прыведзены ў выкананне.
“Падача звароту ў Камітэт ААН па правах чалавека гэта адзіны магчымы міжнародны механізм абароны правоў асуджанага да смяротнага пакарання Юзэпчука. Мы спадзяемся, што беларускія ўлады прыслухаюцца да міжнародных праваабарончых арганізацыяў і не будуць прыводзіць дадзены прысуд у выкананне”, - адзначыў прадстаўнік Праваабарончага Цэнтру “Вясна” Валянцін Стэфановіч.
