На мяжы затрымалі актывістаў кампаніі супраць смяротнага пакарання ў Беларусі
5 кастрычніка на памежным пункце “Каменны Лог” былі затрыманыя актывісткі кампаніі “Праваабаронцы супраць смяротнага пакарання ў Беларусі” Ірына Тоўсцік і Паліна Сцепаненка. Іх высадзілі з аўтобусу “Вільня-Менск”. Супрацоўнікі Ашмянскай мытні затрымалі інфармацыйныя матэрыялы кампаніі, якія везлі актывісткі.
Налепкі і буклеты “Скажы НЕ смяротнаму пакаранню” былі прымеркаваныя да Сусветнага дня барацьбы супраць смяротнага пакарання, што адзначаецца 10 кастрычніка. Пратакол затрымання тавараў і дакументаў на іх склаў старэйшы інспектр Ашмянскай мытні Шумскі Аляксандр Мікалаевіч.
- Мытнікі нам сказалі, што налепкі і буклеты будуць адпраўлены на экспертызу ў праваахоўныя органы ў Ашмяны. Таксама паведамілі, што пасля мы можам забраць сваю інфармацыйную прадукцыю, - распавяла праваабаронца Ірына Тоўсцік.
Між іншым І.Тоўсцік адзначыла, што супрацоўнікі мытні, з якімі актывісткам давялося размаўляць, паказалі сябе дасведчанымі ў праблеме смяротнага пакарання і даволі прыхільна паставіліся да інфармацыі, выкладзенай у буклетах. Нават сказалі, што таксама супраць смяротнага пакарання, падкрэсліла Ірына.
На памежным пункце П.Сцепаненка і І.Тоўсцік пратрымалі прыкладна з 15.30 да 18.00. Да Менску яны дабіраліся спадарожнай машынай. Актывісткі выказалі спадзяванне на тое, што усё ж атрымаецца вярнуць друкаваную прадукцыю, як ім паабяцалі мытнікі.
