Скажы НЕ смяротнаму пакаранню

Актывісты кампаніі “Праваабаронцы супраць смяротнага пакарання” ў мінулыя выходныя і напярэдадні правялі шэраг інфармацыйных акцый за адмену гэтага дзікунскага віду пакараньня.  Пікеты прайшлі ў многіх гарадах Беларусі і былі прымеркаваныя да Міжнароднага дня супраць сьмяротнага пакараньня, які адзначаецца 10 кастрычніка. Беларусь застаецца адзінай краінай у Эўропе, якая працягвае ўжываць сьмяротнае пакараньне.

Бабруйск: Пікетоўцы падтрымалі акцыю, прымеркаваную да Міжнароднага дня супраць сьмяротнага пакараньня. 10 кастрычніка сябры трох ініцыятыўных груп: Рыгора Кастусёва, Андрэя Саннікава, Яраслава Раманчука  павесілі на стэндах з інфармацыяй аб сваіх прэтэндэнтах улёткі з надпісам “Не смяротнаму пакараньню”. Мінакі рэагавалі на ўлёткі станоўча, а да ініцыятыўнай групы Рыгора Кастусёва нават падыйшоў маладзён ў майцы з лагатыпам кампаніі “Не сьмяротнаму пакараньню” і пакінуў свой подпіс.

Баранавічы: Праціўнікі смяротнага пакарання двумя групамі хадзілі па горадзе, сустракаліся з людзьмі і раздавалі ім інфармацыйныя матэрыялы аб неабходнасці забароны смяротнага пакарання. Найперш, гэта каляровы каляндарык, які інфармуе грамадзян аб тым, што Беларусь засталася адзінай краінай у Еўропе, дзі існуе смяротнае пакаранне. Людзі з задавальненем бралі для азнакамлення таксама і каляровы буклет, прысвечаны адмене смяротнага пакарання. Актывіст Руху “За Свабоду” Віктар Сырыца адзначыў, што мэта акцыі − гэта адмена смяротнага пакарання і далучэнне Беларусі да агульнаеўрапейскіх каштоўнасцяў. "Мы імкнуліся пераканаць людзей, што смяроннаму пакаранню не павінна быць месца ў дэмакратычным грамадстве", − зазначыў спадар Віктар. 

Віцебск: Правааборонцы Віцебска прынялі актыўны ўдзел у акцыі, прысвечанай адмене сьмяротнага пакараньня, зрабіўшы некалькі перфомансаў у горадзе. Акцыі праходзілі цягам 10 кастрычніка па ўсім горадзе: на Чкалаўскім рынку, каля помніка загінуўшым вайскоўцам у Афганістане, ва ўрочышчах Паляі, дзе ў 30-50 гадах мінулага стагоддзя адбываліся масавыя пакараньні сьмерцю мірных грамадзян.

У Гародні мясцовыя праваабаронцы ў рамках міжнароднага дня супраць смяротнага пакарання правялі інфармацыйную акцыю. Некалькі гадзін грамадскія актывісты з “Вясны” і БХК стаялі з інфармацыйнымі матэрыяламі на ўваходзе ў цэнтральны Скідзельскі рынак, апрануўшыся ў кашулькі з лагатыпамі “Не смяротнаму пакаранню”. Адбывалася гэта ў досыць людным месцы. Гарадзенскія грамадскія праваабаронцы вялі гутаркі з мінакамі і даводзілі сваю пазіцыю, звяртаючы ўвагу жыхароў на тое, што Беларусь засталася адзінай краінай у Еўропе, дзе дагэтуль юрыдычна замацавана смяротнае пакаранне. Пэўны маніторынг размоў засведчыў, што бальшыня з цікаўных выказвалася якраз супраць смяротнага пакарання. Акцыя прайшла спакойна і без эксцэсаў

Гомель: Правабаронцы Анатоль Паплаўны і Леанід Судаленка правялі акцыю супраць сьмяротнага пакараньня на адным з самых ажыўленых аўтобусных прыпынкаў горада. Гамяльцы цікавіліся праблемай, высвятлялі падрабязнасьці выкарыстання гэтага віду пакараньня.У той жа дзень актывіст праваабарончага руху Андрэй Стрыжак праз прадстаўнікоў ініцыятыўных груп, нагадаў кандыдатам у прэзідэнты аб важнасьці пытаньня адмены сьмяротнага пакараньня ў Беларусі.
У ходзе акцыі сябры ініцыятыўнай групы У. Някляева і А. Саньнікава, а таксама гараджане, якія падпісваліся за гэтых кандыдатаў, атрымалі інфармацыйныя матэрыялы, прысьвечаныя праблеме сьмяротнага пакараньня ў Беларусі. Актывіст Андрэй Стрыжак лічыць: «Праблема смяротнага пакарання - гэта пытанне, які не вырашаецца выключна змяненьнем стаўленьня грамадства да гэтай праблемы. Указ аб мараторыі ў нас усё-такі павінен падпісаць кіраўнік дзяржавы, а так як пасля выбараў ён можа стаць і іншым, то я вырашыў звярнуцца да патэнцыйных кандыдатаў у прэзідэнты праз іх прадстаўнікоў. Шкада, што пікету было ўсяго два, але я думаю, што дзякуючы СМІ, пазіцыю па пытанні адмены смяротнага пакарання змогуць азначыць усе будучыя кандыдаты ў прэзідэнты РБ.

Менск: 10 кастрычніка актывісты кампаніі супраць сьмяротнага пакараньня правялі інфармацыйную акцыю, каб яшчэ раз нагадаць беларускаму грамадству аб праблеме сьмяротнага пакараньня  ў нашай краіне. Праваабаронцы і моладзевыя актывісты зладзілі інфармацыйны ланцуг каля гастранома "Цэнтральны" (станцыя метро "Кастрычніцкая"), пад час якога мінчукам было раздадзена больш за тысячу інфармацыйных буклетаў, якія распавядаюць ад праблеме сьмяротнага пакараньня і аб тых муках, якія мусяць вынесьці сваякі пакараных, якія ня ведаюць нават, дзе пахаваныя іх блізкія. Многія мінакі здзіўляліся таму, што ў нас да цяперашняга часу існуе такая кара, некаторыя  бралі буклеты і чытаючы,  ішлі далей. Удзельнікі акцыі былі апранутыя ў адмысловыя майкі з яскравым надпісам: “Скажы “Не” сьмяротнаму пакараньню”. Супрацоўнікі міліцыі, вывучыўшы змест інфармацыйных матэрыялаў, не сталі перашкаджаць правядзеньню акцыі.

Жодзіна: 10 кастрычніку ў Жодзіне мясовыя праваабаронцы правялі шэраг розных па форме інфармацыйных акцый. Апранутыя ў футболкі з надпісам «Скажы НЕ сьмяротнаму пакараньню» жодзінскія актывісты наведалі будынак Моладзевага цэнтру й прэзентавілі інфармацыйныя матэрыялы ягонаму кіраўніцтву, пабывалі ў моладзевай кавярні, дзе таксама пакінулі буклеты, нелепкі й плякаты. Інфармаваньне жодзінцаў праходзіла шляхам раздачы адмысловых друкаваных інфармацыйных матэрыялаў, каляровых буклетаў, каляндарыкаў, з распаўсюдам налепак па вуліцах і ў дварах, на людных пляцоўках гораду. Праваабаронцы размаўлялі з зацікаўленымі грамадзянамі, некаторым распавядалі пра сутнасьць існуючай у Беларусі праблемы, некаторым - больш падрабязна тлумачылі ўласную пазыцыю па ёй. Да 18-00 вечара, удзельнікі праваабарончых інфармацыйных акцыяў у Жодзіне здолелі абыйсьці альбо аб'ехаць на роварах шмат людных і знакавых месцаў, правесьці перасоўныя мабільныя пікеты ля Царквы й Касьцёлу, сустракаліся й размаўлялі з людзьмі ля рынкаў, крамаў, у дварах, на тэрыторыі прылеглай да леса-паркавай зоны адпачынку гараджанаў. За ўвесь час правядзеньня акцыяў у Жодзіне не было аніводнай адмоўнай рэакцыі на яе з боку простых грамадзянаў. Жодзінцы вельмі станоўча рэагавалі на інфармацыю і матырыялы.

Наваполацак: У наваполацку акцыя прайшла напярэдадні, 6 кастрычніка. У гэты дзень актывісты кампаніі ў людных месцах раздавалі каляндарыкі, улёткі ды іншую друкаваную прадукцыю на тэму сьмяротнага пакараньня.

10 кастрычніка акцыі “Скажы "Не" сьмяротнаму пакараньню” прайшлі таксама ў Баранавічах, Бярозе, Барысаве, Магілёве, Маларыце ды іншых гарадах.

10 кастрычніка у Вільні музыкі зь Беларусі і Літвы адыгралі разам на адной сцэне дабрачынны канцэрт, каб заклікаць людзей сказаць “НЕ!” сьмяротнай кары ў Беларусі.

У  Жытоміры ў гэты дзень мясцовыя актывісты міжнароднай праваабарончай арганізацыі «Amnesty International» зладзілі акцыю з нагоды Дня супраць смяротнага пакарання. У арганізацыі мерапрыемства ўзялі ўдзел беларусы Ігар Коктыш, Арцём Дубскі і Віталь Цішчанка.