Прапанова Сняжаны Неўдах аб разгалошванні месцаў пахавання растраляных будзе разгледжаная
Жыхарка горада Брэста Сняжана Неўдах атрымала адказ з Нацыянальнага Цэнтра заканадаўства і прававых даследаванняў РБ на свой зварот да прэзідэнта ад 28 кастрычніка 2010 года.
У адказе гаворыцца, што прапанова Неўдах аб унясенні змянення ў Крымінальна-выканаўчы кодэкс будзе разгледжана рабочай групай Цэнтра ў рамках падрыхтоўкі праекта Закона РБ "Аб унясенні змяненняў і дапаўненняў у Крымінальна-выканаўчы кодэкс РБ", распрацоўка якога прадугледжана праектам плана падрыхтоўкі законапраектаў на 2011 год.
Праваабаронца Раман Кісляк лічыць такі адказ станоўчым:
- Гэта часовы, пазітыўны вынік, які дае нам надзею на прыемнае для нас рашэнне. Я чакаю, што ў наступным годзе мы пабачым закон аб зменах і гэты выраз будзе вынесены з Крымінальнага кодэксу.
Гэта ўжо другі зварот Сняжаны Неўдах да прэзідэнта РБ. У сваіх пісьмах жанчына прасіла дапамагчы маці расстралянага Андрэя Жука Святлане Жук даведацца, дзе пахаваны яе сын. У апошнім звароце Неўдах прасіла змяніць Крымінальна-выканаўчы кодэкса, выдаліўшы з яго сказ: пра месца пахавання не разгалошваецца.
