“Міжнародная амністыя” асудзіла сьмяротны вырак Канавалаву і Кавалёву
“Міжнародная амністыя” выступіла з асуджэньнем сьмяротнага выраку, вынесенага 30 лістапада Дзьмітрыю Канавалаву і Уладзіславу Кавалёву па крымінальнай справе аб красавіцкім тэракце ў Менску.
“У нас маюцца сур’ёзныя падозранні, што ў дачыненьні Дзьмітрыя Канавалава і Уладзіслава Кавалёва ужываўся гвалт, каб дабіцца ад іх прызнання, і што гэты працэс не адпавядае міжнародным стандартам справядлівасьці”,- заявіў дырэктар праграмы Еўропы і Цэнтральнай Азіі "Міжнароднай амністыі" Джон Дальхуісэн.
“Сістэма правасуддзя ў Беларусі мае шмат недахопаў і рэгулярна топча міжнародныя стандарты справядлівага суду, павялічваючы рызыку судовай памылкі і пакараньня невінаватых”,- адзначыў Джон Дальхуісэн.
“Пакараньне сьмерцю – незваротнае, і мы выступаем супраць яго ва ўсіх выпадках. Прэзідэнт Лукашэнка павінен неадкладна абвесьціць мараторый на сьмяротнае пакараньне, далучыўшыся да шэрагу краін, якія адмовіліся ад гэтага варварскага пакараньня”,- заявіў прадстаўнік “Міжнароднай амністыі”.
“Сьмяротнае пакараньне – надзвычай жорсткі, бесчалавечны і зьневажальны від пакараньня. Беларусь застаецца адзінай краінай Еўропы і былога СССР, якая працягвае прыводзіць сьмяротныя прысуды ў выкананьне”,- нагадаў Джон Дальхуісэн.
