Дзмітрый Канавалаў не сустракаўся з бацькамі
Прынаміс, адвакату "смяротніка" Канавалава нічога пра гэта не вядома.
"Наколькі я ведаю, наведванняў сваякоў не было. Яны са мной не звязваліся па гэтым пытанні. І падчас размоваў са сваякамі такі момант не абмяркоўваўся", — распавядае Еўрарадыё адвакат Дзмітрый Лепрэтар.
Нагадаем, што Дзмітрый Канавалаў быў асуджаны да растрэлу за тэракт у мінскім метро. Прашэння аб памілаванні Канавалаў не пісаў, хаця, па словах генеральнага пракурора Аляксандра Канюка, яму пра гэта нагадвалі двойчы.
Адвакат Дзмітрый Лепрэтар распавёў Еўрарадыё, што пытанне Канавалава ўсё адно будзе разглядацца камісіяй па памілаванні.
"Нашы размовы — гэта адвакацкая таямніца, таму нічога на гэты конт сказаць не магу. Але, відаць, у яго былі нейкія ўнутраныя прычыны. Ва ўсялякім выпадку, кожны прысуд, дзе ёсць выключная мера пакарання, праходзіць камісію па памілаванні — незалежна ад таго, напісана хадайніцтва ці не. Усе дакументы рыхтуюцца і праходзяць камісію, і ўсе дакументы ў кожным разе лягуць на стол да прэзідэнта".
