Скажы НЕ смяротнаму пакаранню

Вярхоўны прадстаўнік ЕС па замежных справах і палітыцы бяспекі Кэтрын Эштан заклікала да ўвядзення мараторыя на смяротную кару ў Беларусі.

"Тое, што смяротная кара ўсё яшчэ прымяняецца па суседстве з намі, гэта жудасна. Я цалкам упэўнена ў неабходнасці ўвядзення глабальнага мараторыя на смяротную кару, асабліва калі мы бачым яе (прымяненне) у Беларусі, дзе сітуацыя пагаршаецца", — цытуе РІА Новости заяву Эштан, зробленую 1 лютага ў Еўрапарламенце ў Бруселі.

Яна адказала на пытанне аднаго з парламентарыяў, якое яе стаўленне да смяротных прыгавораў, вынесенных 30 лістапада ў Беларусі 25-гадовым Дзмітрыю Канавалаву і Уладзіславу Кавалёву за тэракт у мінскім метро вясной 2011 года.

Як ужо паведамлялася, прыгавораны да смяротнай кары Канавалаў прызнаў прыгавор у дачыненні да сябе законным. Другі фігурант па справе аб тэракце Кавалёў раней падаў прашэнне аб памілаванні, у хуткім часе павінна быць дадзена заключэнне па гэтым пытанні.

Тэракт адбыўся ў Мінску 11 красавіка 2011 года. У выніку 15 чалавек загінулі, больш як 200 атрымалі раненні. Асноўным абвінавачваным па справе праходзіў Канавалаў, які, як прызнаў суд, сканструяваў выбуховае прыстасаванне, прынёс у метро і ўзарваў. Кавалёў, на думку суда, ведаў аб рыхтаваным тэракце, але не паведаміў у праваахоўныя органы.

13 снежня ў інтэрв'ю галоўнаму рэдактару радыёстанцыі "Русская служба новостей" Сяргею Дарэнку Аляксандр Лукашэнка заявіў, што кожны дзень думае пра лёс Дзмітрыя Канавалава і Уладзіслава Кавалёва.

"Самая страшная функцыя — гэта калі ты падпісваеш указ, дзе чалавека нельга памілаваць, — сказаў Лукашэнка. — Асабліва ў Беларусі, таму што ў нас ёсць пажыццёвае зняволенне і выключная мера пакарання. І калі ёсць хоць самае маленькае сумненне, хоць крышачку... Хаця пажыццёвае зняволенне, як многія кажуць, гэта страшней, чым смяротная кара, таму што чалавек у клетцы сядзіць, груба кажучы. Але тым не менш раптам ты памыліўся і ўзяў на сябе?"

Паводле слоў Лукашэнкі, ён прыме рашэнне пра тое, памілаваць ці не Канавалава і Кавалёва, пасля таго як яму прадставяць усе неабходныя дакументы. Пры гэтым ён зазначыў, што спачатку ўсе дакументы праходзяць праз спецыяльную камісію па памілаванні пры прэзідэнце.