Адміністрацыя прэзідэнта абяцае правесці “комплексны прававы аналіз”
Любоў Кавалёва, маці асуджанага да смяротнага пакарання Уладзіслава Кавалёва, накіравала звароты ў розныя дзяржаўныя органы, якія маюць права звяртацца ў Канстытуцыйны суд дзеля вынясення заключэнняў, у тым ліку – у Адміністрацыю прэзідэнта. Л.Кавалёва прасіла гэтыя органы ўнесці прапановы ў Канстытуцыйны суд аб увядзенні ў Крымінальна-выканаўчы кодэкс Рэспублікі Беларусь артыкула аб прыпыненні выканання смяротнага прысуду ў сувязі са зваротам ў Камітэт па правах чалавека ААН.
З адказу з Адміністрацыі прэзідэнта за подпісам загадчыка аддзела па пытаннях грамадзянства і памілавання Аляксандра Кісялёва жанчына даведалася, што для разгляду яе прапановы патрэбны комплесны прававы аналіз заканадаўства з удзелам кампетэнтных органаў.
Юрыст-праваабаронца Раман Кісляк лічыць такі прамежкавы адказ пазітыўным. На думку праваабаронцы, ёсць спадзяванні, што гэтае пытанне будзе вывучана, і недахопы выпраўленыя. Асуджаны да смяротнага пакарання, які звярнуўся ў міжнародныя структуры за абаронай сваіх правоў, павінен быць упэўнены, што яго не расстраляюць, пакуль яго пытанне не будзе разгледжана па сутнасці.
Нагадаем, што Любоў Кавалёва аналагічныя звароты накіравала ў Савет Міністраў, Вярхоўны суд, Савет Рэспублікі і Палату Прадстаўнікоў.
