У Польшчы сабралі больш за дзве тысячы подпісаў за адмену смяротнага пакарання ў Беларусі
-
- Любоў Кавалёва
Пра гэта распавяла Любоў Кавалёва, маці аднаго з расстраляных паводле абвінавачання ў тэрарызме пасля выбуху ў менскім метро 11 красавіка 2011 года. Маці і сястра асуджанага да смяротнага пакарання, якое было выканана ў сакавіку гэтага года, вярнуліся з Польшчы, дзе сустракаліся з жонкай прэзідэнта Ганнай Камароўскай і журналістамі шэрагу выданняў і мясцовых тэлеканалаў.
Любоў Кавалёва паведаміла, што збор подпісаў за адмену ў Беларусі смяротнага пакарання ініцыявалі супрацоўнікі тэлеканала TVN-24, які выпусціў фільм пра выбух у менскім метро і яго наступствы:
“Больш за дзве тысячы подпісаў сабралі літаральна за некалькі гадзінаў! Увогуле паездка была вельмі напружанай – было шмат сустрэчаў, шмат здымак, некалькі прэсавых канферэнцый. І паўсюль мы адчувалі спагаду людзей, іхную ўвагу і цеплыню”.
Любоў і Тацяна Кавалёвы ездзілі ў Польшчу па запрашэнні польскага боку. У праграме паездкі была сустрэча з першай ледзі Польшчы.
"У нас была досыць працяглая і шчырая размова, і жонка прэзідэнта Ганна Камароўска адназначна выказалася за адмену смяротнага пакарання ў Беларусі – апошняй еўрапейскай краіне, дзе яно існуе. Першая ледзі краіны выказала спадзяванне, што на смяротнае пакаранне будзе ўведзены мараторый – як гэта належыць у цывілізаванай краіне", - распавяла Любоў Кавалёва.
