У Бялыніцкім раёне прэзентавалі “Апошні золак”
28 жніўня ў Бялыніцкім раёне ў межах кампаніі “Праваабаронцы супраць смяротнага пакарання” адбылася прэзентацыя дыска “Апошні золак” і паказ анімацыйнага фільма “Выканаўца”.
Мерапрыемства адбылося ў прыватным доме ў аграгарадку Вялікая Машчаніца Бялыніцкага раёна. Каардынатар кампаніі “Праваабаронцы супраць смяротнага пакарання” Андрэй Палуда распавёў грамадскім актывістам Бялыніцкага раёна аб кампаніі, а таксама прэзентаваў дыск “Апошні золак”, у межах якога вядомыя беларускія музыкі аб’ядналіся з песнямі супраць смяротнага пакарання.
Пасля гэтага грамадскія актывісты Бялыніччыны сумесна паглядзелі анімацыйны фільм “Выканаўца”, які быў створаны творчай групай валанцёраў кампаніі “Праваабаронцы супраць смяротнага пакарання”. У фільме ставіцца пытанне пра жыццё і лёс людзей, якія з’яўляюцца выканаўцамі смяротных прысудаў і якія незаўважна жывуць побач з намі.
Андрэй Палуда таксама азнаёміў прысутных актывістаў з іншай відэапрадукцыяй, якая была зроблена ў межах кампаніі “Праваабаронцы супраць смяротнага пакарання”.
Напрыканцы сустрэчы ўсе яе ўдзельнікі атрымалі ў падарунак дыскі з песнямі праекта “Апошні золак”.
