Савет Міністраў парушае заканадаўства аб зваротах грамадзян
-
- Тамара Сялюн на выставе "Вышэйшая мера".
Апарат Савета Міністраў адказаў Тамары Сялюн, маці пакаранага Паўла Селюна, на зварот па ініцыяванні перад Канстытуцыйным судом пытання аб адпаведнасці артыкула 175 Крымінальна-выканаўчага кодэкса Канстытуцыі Беларусі.
У адказе за подпісам начальніка аддзела па працы са зваротамі грамадзян і юрыдычных асобаў Л.І. Астроўскай гаворыцца:
“Інфармуем, што Прэзідыумам Савета Міністраў Рэспублікі Беларусь 4 мая 2015 года прынята рашэнне аб адмове ў задавальненні вашай просьбы аб накіраванні Саветам Міністраў Рэспублікі Беларусь ва ўстаноўленым парадку ў Канстытуцыйны суд прапановы аб праверцы на адпаведнасць Канстытуцыі Рэспублікі Беларусь артыкула 175 Крымінальна-выканаўчага кодэкса”.
Аднак, такі неаргументаваны адказ не адпавядае патрабаванням да пісьмовых адказаў на звароты грамадзян у парушэнне Закона «Аб зваротах грамадзян і юрыдычных асобаў" (частка 1 артыкула 18), дзе адзначана:
“Пісьмовыя адказы на пісьмовыя звароты павінны быць абгрунтаванымі і матываванымі (пры неабходнасці - са спасылкамі на нормы актаў заканадаўства), змяшчаць канкрэтныя фармулёўкі, якія аспрэчваюць ці пацвярджаюць довады заяўнікаў.
У выпадку, калі ў пісьмовых адказах на пісьмовыя звароты змяшчаюцца рашэнні аб поўнаў або частковай адмове ў задавальненні зваротаў або аб пакіданні зваротаў без разгляду па сутнасці, у такіх адказах указваецца парадак іх абскарджання”.
Тамара Сялюн ўжо накіравала скаргу на такі адказ Савета Міністраў у пракуратуру Маскоўскага раёна г. Мінска.
На дадзены момант прыйшлі адказы на звароты маці пакаранага з Вярхоўнага суду, Палаты прадстаўнікоў і Савета Рэспублікі Нацыянальнага сходу.
Нагадаем, Ленінскі суд г. Гродна адмовіў Тамары Сялюн ва ўзбуджэнні грамадзянскай справы ў дачыненні да Дэпартамента выканання пакаранняў МУС РБ па факце накіравання ў адрас заяўніка спецадзення пакаранага сына Паўла Сялюн. Таксама, і Канстытуцыйны Суд палічыў, што Тамара Сялюн для ініцыяцыі ўнясення змяненняў у Крымінальны кодэкс павінна звярнуцца ў адпаведныя органы, а не наўпрост у суд. Пасля гэтага маці расстралянага накіравала звароты усім суб’ектам, якія могуць паўплываць на ўнясенне зменаў ў Крымінальны кодэкс: Прэзідэнту Рэспублікі Беларусь, Палаце прадстаўнікоў Нацыянальнага сходу Рэспублікі Беларусь, Савету Рэспублікі Нацыянальнага сходу Рэспублікі Беларусь, Вярхоўнаму Суду Рэспублікі Беларусь, Савету Міністраў Рэспублікі Беларусь.
Павел Сялюн быў прысуджаны да смяротнага пакарання і расстраляны 18 красавіка 2014. Прыблізна праз месяц пасля гэтага яго маці Тамары Сялюн была накіравана спецвопратка пакаранага, у якой ён чакаў прывядзення прысуду ў выкананне. Акрамя таго, ёй не былі паведамленыя дакладны час і месца пахавання П. Сялюн, не было выдадзена яго цела для пахавання.
