Заява ЕС з нагоды новага смяротнага прысуду ў Беларусі
Брусель, 17 лютага 2016 г.
16 лютага 2016 года Мінскім абласным судом быў вынесены смяротны прысуд у дачыненні да Сяргея Хмялеўскага. Законнае права сп. Хмялеўскага на абскарджванне прысуду мусіць быць цалкам гарантаванае.
Сп. Хмялеўскі быў прызнаны вінаватым у здзяйсненні сур'ёзнага злачынства, і мы выказваем нашы самыя глыбокія спачуванні родным і блізкім ахвяраў.
ЕС выступае супраць прымянення смяротнай кары, гэтага жорсткага віду пакарання, якое не ў стане дзейнічаць у якасці стрымліваючага фактару. Мы заклікаем Беларусь, адзіную краіну ў Еўропе, якая да гэтага часу ўжывае смяротнае пакаранне, далучыцца да глабальнага мараторыя ў якасці першага кроку на шляху да адмены смяротнай кары. Важнымі крокамі ў гэтым кірунку магла б стаць замена смяротных прысудаў на пажыццёвыя і адкрытае публічнае абмеркаванне тэмы смяротнага пакарання ў беларускім грамадстве.
Крыніца: сайт службы дыпламатыі ЕС
