Скажы НЕ смяротнаму пакаранню

Парламенцкая Асамблея Савета Еўропы бачыць сваёй задачай набліжэнне Беларусі да каштоўнасцяў Савета Еўропы, заявіў дакладчык ПАСЕ Андрэа Рыгоні 23 лістапада ў Мінску на сустрэчы з намеснікам прадстаўніка Палаты прадстаўнікоў Баляславам Пірштуком. Пра гэта піша БелаПАН.

Пасля чэрвеньскага дакладу ПАСЕ па Беларусі "мы павінны зарэгістраваць нейкія крокі насустрач у параўнанні з тым, што было", сказаў Рыгоні (у дакладзе, падрыхтаваным Рыгоні, адзначалася, што, нягледзячы на паляпшэнне палітычнага клімату аж да сакавіка 2017 года, сістэматычнага паляпшэння сітуацыі з правамі чалавека ў Беларусі не назіраецца. — БелаПАН.).

Рыгоні звярнуў увагу на інтэнсіўнасць свайго візіту ў Беларусь, у прыватнасці, на запланаваныя сустрэчы ў рэгіёнах. "Я думаю, што гэта сведчыць аб чарговым кроку ў адносінах Рэспублікі Беларусь як дзяржавы з Саветам Еўропы", — дадаў дакладчык.

"Крокі наперад робяцца ў працэсе размовы, абмену думкамі, дыскусій, — перакананы Рыгоні. — А калі кожны сядзіць у сябе дома, маўчыць, глядзіць здалёку, ніякі крок наперад зрабіць немагчыма. І мы бачым сваёй задачай набліжэнне Беларусі да стандартаў і каштоўнасцяў Савета Еўропы". "Наша канчатковая мэта — увесці Беларусь у Савет Еўропы", — падкрэсліў прадстаўнік ПАСЕ.

Ён адзначыў, што ПАСЕ займаецца правамі чалавека і іх абаронай.

"У чэрвеньскім дакладзе мы пералічылі ўсе пазіцыі ў дачыненні да Беларусі. Мы прызналі ўсе пазітыўныя крокі, але падкрэслілі і тое, што яшчэ трэба зрабіць для дасягнення канчатковай мэты. У нас ёсць шэраг прамежкавых крокаў, але мы ўвесь час ідзем за "Палярнай зоркай" — пытаннем мараторыя на пакаранне смерцю", — заявіў Рыгоні.

Ён таксама нагадаў, што ў час ліпеньскай сесіі Парламенцкай асамблеі АБСЕ ў Мінску Аляксандр Лукашэнка "пацвердзіў, што мы робім крокі, каб прыйсці да гэтай мэты".

Дакладчык удакладніў, што са студзеня 2018 года беларускія парламентарыі будуць мець магчымасць удзельнічаць у абмеркаванні ўсіх пытанняў у палітычнай камісіі ПАСЕ. "Дадзеныя рашэнні — гэта скачок іншага ўзроўню, які прадстаўлены ў нашых адносінах", — лічыць ён.

Цяперашні візіт Рыгоні будзе доўжыцца да 27 лістапада. Запланаваныя сустрэчы дакладчыка ПАСЕ ў ніжняй палаце парламента, Мінскім абласным і Валожынскім раённым саветах дэпутатаў. Рыгоні таксама выступіць з лекцыяй у Беларускім дзяржаўным педагагічным універсітэце імя Максіма Танка.

24 лістапада з удзелам дакладчыка ПАСЕ пройдзе пасяджэнне рабочай групы Нацыянальнага сходу па вывучэнні праблематыкі смяротнага пакарання як інструмента пакарання. Як паведаміў БелаПАН кіраўнік групы Андрэй Навумовіч, абмеркаванне пытання аб смяротнай кары з'яўляецца асноўнай мэтай візіту Андрэа Рыгоні.

Беларусь застаецца адзінай еўрапейскай краінай, дзе ўжываюць смяротнае пакаранне. Менавіта з гэтай прычыны яна не ўваходзіць у Савет Еўропы — у 1993 годзе беларускі парламент атрымаў статус спецыяльнага запрошанага ў ПАСЕ, у 1997-м быў пазбаўлены яго пасля рэферэндуму, які захаваў смяротнае пакаранне. Кожны смяротны прысуд у Беларусі традыцыйна асуджаецца інстытутамі Савета Еўропы.

Выступаючы 5 ліпеня на сесіі ПА АБСЕ ў Мінску, Аляксандр Лукашэнка заявіў: Беларусь "чуе заклікі" сусветнай супольнасці да адмены смяротнага пакарання і паступова прыйдзе да адмены практыкі яе прымянення.