Смяротнае пакаранне: чым мы горш за ЗША
-
- Андрэа Віктарын. Фота TUT.BY
Чаму ЗША можна мець смяротнае пакаранне, а Беларусі - не? Пра гэта распавяла ў інтэрв'ю TUT.BY кіраўніца прадстаўніцтва ЕС у Мінску Андрэа Віктарын.
- Некаторыя лічаць, што смяротнае пакаранне - гэта пытанне цаны, і калі б Лукашэнка бачыў канкрэтна, што ён атрымае за мараторый... Як вы думаеце, што б Мінск атрымаў ад Еўрасаюза ў такім выпадку, якія б дзверы гэта адчыніла?
- Мараторый вельмі моцна змяніў бы імідж краіны. Гэта стала б вялікім крокам. Улічваючы жаданне Мінска мець больш глыбокія эканамічныя адносіны з Еўрасаюзам і краінамі-чальцамі, гэта было б вельмі важна.
- А можаце растлумачыць сувязь паміж смяротным пакараннем і эканамічным іміджам?
- Гэта не зусім эканамічны імідж. Еўрапейскія інвестары, якія думаюць прыйсці ў Беларусь, хочуць бачыць агульны імідж краіны. І гэты момант - смяротнае пакаранне - гуляе вялікую ролю ў шматлікіх краінах Еўропы.
- Але не гуляе ролі, калі тыя ж кампаніі хочуць інвеставаць у ЗША ці Японію, дзе смяротнае пакаранне таксама ёсць? Чаму гэта абцяжарваючы фактар для Беларусі?
- Таму што вашу краіну яшчэ недастаткова ведаюць, ёсць шмат стэрэатыпаў, і гэта стала б вельмі пазітыўным крокам.
- Вы сказалі, што мараторый палепшыць імідж, але не сказалі, ці зробіць Еўрасаюз нешта ў адказ на гэты крок.
- Я не магу цяпер пра гэта сказаць. Але я думаю, калі будзе ўведзены мараторый, гэта зменіць пазіцыю некаторых крытычна настроеных членаў ЕС і спросціць многія рэчы. Але не прасіце мяне павесіць цэннік на смяротнае пакаранне.
І сэнс не ў гэтым, мы стараемся данесці, што мы супраць смяротнага пакарання, дзе б яно ні прымянялася.
- Чамусьці гэта не становіцца такой жа перашкодай ў вашым супрацоўніцтве з ЗША.
- Там мы таксама ўздымаем гэтае пытанне.
- Але гэта не перашкаджае ніякаму супрацоўніцтву, праўда?
- Справа ў тым, што ў нас крыху іншыя адносіны з ЗША.
- Гэта пытанне аб падвойных стандартах, і Лукашэнка яго пастаянна прыводзіць як контраргумент: чаму мы павінны адмяняць смяротнае пакаранне, а перадавік дэмакратыі, ЗША, не павінны?
- Таму што вы адзіная краіна ў Еўропе, якая прымяняе смяротнае пакаранне. А наконт таго, што быў рэферэндум і людзі прагаласавалі за гэта, заўсёды патрэбна палітычная воля. Калі вы паглядзіце на некаторыя прыклады [адмены смяротнага пакарання] ў Еўрасаюзе, было валявое рашэнне лідэраў.
- Пайсці супраць грамадскай думкі?
- Так.
