31 студзеня будзе зацверджаны яшчэ адзін смяротны прысуд?
Як паведаміў праваабарончаму цэнтру "Вясна" каардынатар кампаніі "Праваабаронцы супраць смяротнага пакарання" Андрэй Палуда, 31 студзеня ў 9.30 судовая калегія па крымінальных справах Вярхоўнага суда разгледзіць апеляцыйную скаргу Віктара Сергіля і Наталлі Колб.
Раней Брэсцкі абласны суд (суд першай інстанцыі) прызначыў Віктару Сергілю смяротнае пакаранне. 48-гадовага мужчыну і 26-гадовую Наталлю Колб прызналі вінаватымі ў групавым забойстве заведама малалетняй з асаблівай жорсткасцю з хуліганскіх меркаванняў (ч.2 арт. 139 КК РБ). Санкцыя артыкула прадугледжвае ад 8 да 25 гадоў пазбаўлення волі, пажыццёвае зняволенне або смяротнае пакаранне. Нагадаем, што апошнія два віды пакарання ў Беларусі да жанчын не ўжываюцца.
