Рэгіёны: акцыі праваабаронцаў да Тыдня супраць смяротнага пакарання

10.10.2018

: Спецвыпуск газеты "Народная Воля"

У рэгіёнах Беларусі актывісты кампаніі “Праваабаронцы супраць смяротнага пакарання ў Беларусі” праводзяць традыцыйную інфармацыйную акцыю з раздачай спецвыпускаў газет “Народная Воля”. Акцыі ладзяцца ў межах Тыдня супраць смяротнага пакарання, які праходзіць у Беларусі з 5 па 10 кастрычніка.

Такім чынам правабаронцы і прыхільнікі адмены смяротнага пакарання прыцягваюць увагу грамадскасці да праблемаў смяротнага пакарання, у прыватнасці да ўмоваў утрымання зняволеных у камерах смяротнікаў.

Спецыяльна для спецвыпуска газеты матэрыялы на тэму смяротнага пакарання падрыхтавалі вядомыя пісьменнікі, публіцысты і паэты (Уладзімір Некляеў, Алесь Бяляцкі, Сяржук Сыс, Сяргей Дубавец, Галіна Дубянецкая, Паліна Сцепаненка і Аляксандр Фядута).

Распачалі інфармацыйную акцыю ў рэгіёнах 6 кастрычніка светлагорскія праваабаронцы і грамадскія актывісты. Алена Маслюкова, праваабаронца ПЦ “Вясна”, адзначыла, што мінакі ахвотна бралі прапанаваныя газеты.

: Алена Маслюкова раздае "Народную волю" ў Светлагорску

Рэчыца: Мясцовыя актывісты праваабарончага цэнтру “Вясна” 7 кастрычніка зладзілі раздачу гараджанам спецвыпуска газеты “Народная воля”, прысвечанага праблеме смяротнага пакарання, якое выкарыстоўваюць улады Беларусі. Да акцыі далучыліся таксама рэчыцкія актывісты Партыі БНФ і грамадскага аб’яднання “Гавары праўду”.

Амаль паўтысячы асобнікаў газеты бясплатна раздалі актывісты людзям у самых ажыўленых пунктах горада – рынках “Цэнтральны” і “Славянскі”. Варта адзначыць, што сёлета рэчычане значна больш ахвотна бралі ў актывістаў альтэрнатыўную афіцыйным крыніцу інфармацыі. Некаторыя казалі, што ім надакучыла відавочная хлусня афіцыйных СМІ, і яны хочуць пабачыць аб’ектыўны погляд на сітуацыю ў краіне.

Пытанне спынення смяротнага пакарання цяпер не вельмі актуалізаванае ў рэгіёнах. Тут людзей клапоцяць у асноўным праблемы звычайнага фізічнага выжывання. Нягледзячы на тое, што намінальна Рэчыцкі раён уваходзіць у пяцёрку рэгіёнаў з найвышэйшым сярэднім заробкам у Беларусі, больш-менш годныя даходы тут маюць толькі некалькі тысяч работнікаў аб’яднання “Беларусьнафта”, – адзначае кіраўнік Рэчыцкага аддзялення ПЦ “Вясна” Валер Пуціцкі. – Менавіта таму праваабаронцам і дэмакратычным актывістам варта падштурхоўваць людзей да асэнсавання і такіх рэчаў, як узаконенае пазбаўленне людзей жыцця.

: Праваабаронца Валер Пуціцкі за раздачай спецвыпуска газеты "Народная Воля".

У панядзелак, 8 кастрычніка, падтрымалі інфармацыйную акцыю ў Магілёве і Баранавічах.

Магілёўскі праваабаронца Аляксей Колчын адзначыў, што старэйшае пакаленне разбірала газеты больш ахвотна:

«Друкаваную прэсу яшчэ пакуль рана хаваць. Для людзей ва ўзросце інфармацыя ў газеце, асабліва па такім важным пытанні як смяротнае пакаранне, вельмі важная».

: Аляксей Колчын раздае газеты ў Магілёве

mspring.online піша, што ў Магілёве праваабаронцы і валанцёры раздалі амаль паўтысячы асобнікаў спецвыпуску газеты «Народная воля».

Баранавіцкія праваабаронцы актывісты таксама перадалі, што газеты “Народнай Волі” разышліся хутка.

: Баранавіцкія праваабаронцы і актывісты

Праваабаронца "Вясны" Аляксандр Вайцешык перадаў, што з раздачай газет выходзілі ў самыя шматлюдныя месцы Баранавічаў.

: Праваабаронца "Вясны" Аляксандр Вайцешык

У аўторак, 9 кастрычніка, да акцыі далучыліся гарадзенскія праваабаронцы, піша "Гарадзенская вясна". Яны выйшлі на шматлюдны Скідзельскі рынак з раздачай спецвыпуску "Народная Воля", каб праінфармаваць гарадзенцаў пра праблемы смяротнага пакарання ў Беларусі.

: Гарадзенскія праваабаронцы раздаюць "Народную Волю"

У гэты ж дзень інфармацыйныя акцыі адбыліся ў Гомелі, Бярозе, Барысаве і іншых гарадах.

Гомель.

: Андрэй Стрыжак раздае спецвыпуск Народнай Волі ў Гомелі.

Бяроза.

: Тамара Шчапёткіна падчас інфармацыйнай акцыі ў Бярозе.

: Сяржук Русецкі падчас інфармацыйнай акцыі ў Бярозе.

Бярозаўскія праваабаронцы правялі акцыю на вуліцах Бярозы: дыскутавалі з людзьмі па адмене смяротнага пакарання, раздавалі спецвыпуск “Народнай волі”. Многія гаражане выказваліся за смяротнае пакаранне, але значна менш, чым мінулымі гадамі. Калі пачынаеш размаўляць з людзьмі, чаму патрэбна адмяніць - мяняюць стаўленне. Патрэбна дапамога царквы і дзяржавы, каб сфармаваць у людзей цывілізаваны пагляд на гэтую праблему, да такога выніку прыйшлі праваабаронцы "Вясны" з Бярозы.

Барысаў.